लोकपत डिजिटल मीडिया / अहिल्यानगर
नुकत्याच काही दिवसांपूर्वी ‘ति’चं लग्न झालं होतं. लग्नानंतर तिच्या सुखी संसारात मुलाच्या रूपाने आनंदाचा प्रवेश झाला होता. मात्र नियतीला वेगळंच अपेक्षित होतं. जालिंदर करांडे या तिच्या मामेसासऱ्याची तिच्यावर वाईट नजर पडली. लज्जा उत्पन्न होईल, असं वर्तन तो तिच्याशी करायचा. या छळाला आणि सासरच्यांकडून बंगला बांधण्यासाठी पैसे आणण्याच्या तगाद्याला कंटाळून पुनम विशाल लांडगे या विवाहितेनं विषारी औषध घेऊन आत्महत्या केली. याप्रकरणी तिचा नवरा विशाल याला पोलिसांनी अटक केली असली तरी ज्यांच्यामुळे तिने आत्महत्या केली, त्या हरामखोरांना पोलीस कधी अटक करणार, हाच खरा प्रश्न आहे.
दरम्यान, या दुर्दैवी विवाहितेच्या अब्रूशी खेळणाऱ्याकडून एमआयडीसी पोलिसांचे ‘हात ओले’ झाल्याचा नातेवाईकांना संशय आला आहे. अशा विचित्र परिस्थितीत मयत विवाहिता पूनमला कधी न्याय मिळणार, असा तिच्या नातेवाईकांना प्रश्न पडला आहे. राहुरी तालुक्यातल्या देवळाली प्रवरा इथं राहणारे मयत पूनमचे
वडील गोविंद गंगाधर पठारे यांनी एमआयडीसी पोलीस ठाण्यात याप्रकरणी फिर्याद दिलेली असून त्यानुसार गुन्हा दाखल करण्यात आला आहे.
अहिल्यानगर तालुक्यातल्या देहरे इथं सासरी राहत असताना मयत पूनमचा सातत्याने मानसिक आणि शारीरिक छळ केला जात असल्याचं फिर्यादीत म्हटले आहे. बंगल्याच्या फर्निचर आणि रंगकाम करण्यासाठी लागणाऱ्या तीन लाख रुपयांची सासरच्या मंडळींकडून तिच्याकडे सातत्याने मागणी केली जायची. अशातच तिचा मामेसासरा जालिंदर करांडे याची तिच्यावर वाईट नजर पडली. लज्जा उत्पन्न होईल, असं वर्तन तो तिच्याशी सातत्यानं करायचा. हे सहन न झाल्यामुळे पूनमने
विषारी औषध प्राशन करून आत्महत्या केली.
मयत पूनमचा नवरा विशाल रावसाहेब लांडगे याला पोलिसांनी अटक केली असून मामे सासरा जालिंदर सयाजी करांडे, मामे सासू रोहिणी जालिंदर करांडे, सासू सुंदरबाई रावसाहेब करांडे हे अद्यापही उजळमाथ्यानं फिरत आहेत. एमआयडीसी पोलीस या आरोपींना पाठीशी का घालत आहेत? सर्वच आरोपींना पोलिसांनी आत्तापर्यंत अटक का केली नाही? यामध्ये कुठं तरी आर्थिक देवाणघेवाण तर झाली नाही? हे आणि अशा अनेक प्रकारचे प्रश्न मयत पूनमच्या नातेवाईकांमधून उपस्थित केले जात आहेत.
